Umusoro ku nyongeragaciro umenyerewe ku izina rya Teveya(TVA) cyangwa se Veyeti(VAT).

Umusoro ku nyongeragaciro ufite itegeko (Itegeko No 02/2015 ryo ku wa 25/02/2015 rishimangirwa n’irindi tegeko No 37/2012 ryo ku wa 09/11/2012 rigena umusoro ku nyongeragaciro ) riwugena kandi ni inshingano z’umucuruzi (Rwiyemezamirimo) kwiyandikisha.

Nubwo umusoro ku nyongeragaciro ari itegeko ntabwo buri mucuruzi wese agomba kuba yari yandikishije. Hari ibikurikizwa ngo umucuruzi yiyandikishe ku umusoro nyongeragaciro. 

Kwiyandikisha

Ibigo bitegetswe kwiyandikisha ku musoro ku nyongeragaciro iyo bifite   ibyacurujwe birenga amafaranga y’u Rwanda miliyoni makumyabiri (20,000,000 FRW) mu gihe   cy’amezi 12  cyangwa miriyoni eshanu mu mezi atatu yikurikiranya mu  gihembwe cya nyuma cy’umwaka. 

Ni inde wishyura Umusoro Ku Nyongeragaciro?

Umuguzi wa nyuma ni we wishyura umusoro   aho kuba uwiyandikishije ku mpamvu zo gukusanya no gukora ibaruramari   ndetse no kwishyura iyo TVA muri RRA.

Ni izihe inshingano z’umusoreshwa wiyandikishije ku musoro Umusoro Ku Nyongeragaciro?

Ingingo kuva ku ya 57 kugeza ku ya 63 ziteganya   uburenganzira n’inshingano by’umusoreshwa wiyandikishije ku musoro wa   TVA/VAT zirimo izikurikira:

• Gushyira   ahagaragara icyemezo cy’uko  yiyandikishije ku musoro aho kibonwa   neza aho abakiriya binjirira bagana aho akorera.
• Guha inyemezabwishyu ya VAT abakiriya  igihe cyose baguze ibintu na serivisi.
• Kuzuza imenyekanisha cyangwa VAT buri gihembwe ku rupapuro rwabugenewe 
• Kuboneka   buri gihe kugira ngo yakire  abakozi bashinzwe Umusoro wa VAT no   kubaha ibitabo by’ibaruramari  bigaragaza ibikorerwa mu kigo.
• Gukoresha Imashini y’ikoranabuhanga  yemewe mu gutanga inyemezabuguzi.

Mu gihe ufite ikibazo ku bijyanye n’imisoro ushobora guhamagara ikigo cy’igihugu gishinzwe imisoro ku murungo utishyuzwa 3004

Iyi nkuru yakusanyijwe inandikwa na Pacifique Ubukombe